A Weru Buk anun Ioaanes

A pirpir kaapa muga

A buk mi Ioaanes i timui. I piri naa i timui karom a tabuan, iaku mongoro na tena manaana diat nuki naa a tabuan ma ra kum natnatuna ia a pirpir welwelaar u ra lotu ma ra kum tena nurnur. Baa i pirpir un tenawawi ra tabuan, i pirpir u ra lotu un raa taamaan ingen.

U ra buk mi i wapua diat naa diat a maari wetwetalaai diat, ma diat a baboura diat ko ra kum warwaruga na tena wawer.

A winawaan i ra 2 Ioaanes:A turturpaai ra buk mi (1-3)A maarmaari (4-6)A watumaarang u ra kum tena warwaruga (7-11)A tintinip na pirpir (12-13)

2 John

1 Iaau Ioaanes, a mukmuga, iaau timtimu karom ui, a tabuan baa God ia pilak pa ui, ungaai ma ra kum natnatum, baa iaau maari muaat u ra lingtatuna na nurnur. Ma wakir iaau ku, miaat raap kaai baa miaat nunura a lingtatuna miaat maari muaat. 2 Miaat maari muaat kabina u ra lingtatuna baa i ki un daat, ma in ki takum karom daat.

3 A maarmaari, a koina mangamangaan ma ra maalmaal kon God Tamaandaat ma Iesu Kaarisito Natuna, in ki karom daat baa daat ki u ra lingtatuna ma daat maari wetwetalaai daat.

A maarmaari wetwetalaai

4 Iaau gaaia aakit baa iaau walangoroi naa a kum natnatum diat murmur a lingtatuna, welaar ma ra naagagon Tamaandaat ia taar taai taan daat. 5 Ma mari iaau aaring ui, a tabuan, kupi daat a maarmaari wetwetalaai. Wakir iaau timu ta matakina naagagon karom ui, pate. A naagagon ku baa daat aa walangoro taai taanga namuga. 6 Bi ia a maarmaari, baa daat a murmur a kum naagagon anun God. Anuna naagagon, baa namuga muaat aa walangoro taai i lenbi, naa muaat a lalaaun ungaai ma ra maarmaari.

Muaat a baboura muaat ko ra kum tena warwaruga

7 Mongoro na tena warwaruga diat aa waan werweraan main u ra rakrakaan buaal. Diat weoro ku naa Iesu Kaarisito wakir i waan paat a muaana mulu. A mangaana taara maa diat a kum tena warwaruga, ma diat a kum ebaar anun Kaarisito. 8 Muaat a baboura muaat kupi koku muaat ung wa a utnaa baa muaat aa ongor paai. Muaat a tur dekdek kupi muaat a lo paa anumuaat kudulaana wedok. 9 Diat raap baa diat waan ingen paa ko ra kum wawer anun Kaarisito ma pa diat murmuri, God pa i ki karom diat. Ma diat raap baa diat murmur a kum wawer mi, Tamaandaat ma Natuna diaar ki karom diat. 10 Baa te in waan karom muaat ma ta mangaana wawer baa pa i welaar ma ra kum wawer anun Kaarisito, koku muaat gaaia paai ma muaat ben aruki u ra numuaat kum ruma. 11 Baa te in gaaia paai, in welaar mai u ra nuna kum aakaina pinapaam.

A tintinip na pirpir

12 A mongoro na utnaa baa ang timui karom muaat, iaku pa iaau nemi naa ang timtimu u ra dona buk ma ra ina pen. Iaau nuki naa ang waan ut karom muaat, ma ang pirpir karom muaat, kupi in ngaala aakit anundaat gaaia.

13 A kum natnatun tenawawim baa God ia pilak paai, diat taar anundiat maarmaari karom ui.